Verse 1چنیں زد مثل شاہِ گوئندگاںکہ یابندگاں اند جوئندگاں
Verse 2کویاں دے سلطان کہہ گئے ، سندر ایہہ اکھان ڈھونڈن-والین سر-پر اپنا ، منتوَ اک دن پان
Verse 3ب-اسمِ پاک حضرت ، پیر شاہے کراں نامہ شروع اوہو نباہے )
Verse 4پیر میرا اوہ دمڑی والا میراں شاہ قلندر ہر مشکل وچ مدد کریندا دوہاں جہاناں اندر
Verse 5عاصم بن صفوان شاہزادہ والی تخت مصر دا آہا شاہ سلیماں دوجا صاحب دولت زر دا
Verse 6رومی شامی چین مچینی غزنی ہندوستانی زنگی روسی ہور فرنگی یونانی ایرانی
Verse 7ستر شاہ تختاں دے سائیں چاکر سن اس سندے خدمت اندر رہن کھلوتے ہتھیں بدھے بندے
Verse 8ستّ ولایت زمیں آبادی ستے تخت اس ملیا چار تخت دی حد سفرانی عمل اپنے وچ لیا
Verse 9فوجاں لشکر کٹک کروڑاں گنتر وچ نہ آون جے سو منشی لکھ مسدی لکھ لکھ قلم گھساون
Verse 10زول-کرنین سکندر والا شوکت شان زیادہ بادشاہی گھر اس دے دائم آدی دا شاہزادہ
Verse 11کوٹ قلعے در بند ہزاراں چھاؤنیاں ہر دیسیں سدا برت ہر شہر بنائے رسد کھان پردیسیں
Verse 12عادل سخی سکندر جیسا جیوں دریا وچ موجاں زوراوری اوہدی سن کمبن دیو دانوَ دیاں فوجاں
Verse 13راکھش آدم کھاون والے تیغ اوہدی تھیں ڈردے کوہ قافاں دیاں غاراں اندر جا گزراناں کردے
Verse 14جھنڈے چھتر نشان ہزاراں لکھ کوئی سر-کردےسر کردے مہماں تائیں آئِ قدمیں سر دھردے
Verse 15شاہ زمیں دے سارے ڈردے ثانی کوئی نہ آہا اگے آ گزارن نظراں جت ولّ پاوے راہا
Verse 16ہکّ اﷲ دا خوف ہمیشہ دہشت ہور نہ کائی دشمن سبھ تہہ تیغ کیتے سبھ عالم وچ دہائی
Verse 17عیش خوشی جو دنیا والی سبھو سی ہتھ آئی سبھ مراداں چاہاں پائیاں کردا شکر خدائی
Verse 18ہکّ مراد رہی دل اندر گھر اولاد نہ ہوئی جاں جاں اوہ نہ حاصل ہووے ہور نہ سجھدی کوئی
Verse 19عاصم اس اندیشے اندر رات دہاں دلگیریربا ایہہ میری سلطانی دولت فوج گھنیری
Verse 20بن فرزند میرے کس کاری ایہہ سارے اسرگےجاں اس فکر اندر جی جاوے اگّ اندر وچ لگے
Verse 21جاں جاں عمر جوانی آہی لنگھی آسا آسا مجلس لاوے موجاں مانے غم نہ آہا ماسہ
Verse 22باہٹھ ورھے جد عمر وہانی چلی بہار جوانی شاخ ہری رنگ پیلا ہویا آئی رتّ خزانی
Verse 23سرو آزاد لگا خم کھاون چمبے کلیاں گریاں لالے تھیں پھل کیسر ہوئے ہور بہاراں پھریاں
Verse 24سنبل فصل پیا آ گھاٹے نکلن لگیاں تاراں نیندر مست دتی چھڈّ نرگس بیٹھا وانگ بیداراں
Verse 25کستوری آ پہتی اوتھے کستوری سنگ بھوری وچ وچ آن وکھالی دتی کافوری رنگ نوری
Verse 26اوہ سبز-ختز چھاپے والا کرن لگا اے چمبا لگا ویکھ چناری پنجے بید والا تھر-کمبا
Verse 27سرد ہویا دل خوشیاں ولوں دنیا جھوٹھ ککاراجے سے برس کیتی میں شاہی اوڑک چلن ہارا
Verse 28دولت مال خزانے لشکر تخت ولایت شاہی بعد میرے کوئی ہور بہیگا میں ہاں اج کل راہی
Verse 29دل میرے نوں چنگا لگدا تانہیں ایہہ پسارا جے اج اکھیں اگے ہندا ہکّ فرزند پیارا
Verse 30میں کی عجب بے عقلی کردا جھلاں مفت ککارےعاصم شاہ محمد بخشا ایہہ اندیشے دھارے
Verse 31ٹراں مہمیں سختی جھاگاں بہت کراں شکرانہ سے اندیشے رات دہاں وچ عمر اینویں گزراناں
Verse 32اؤتر نام پیا کی کرنا مال متعہ گھنیری گوشے بیٹھاں ہو چپیتا رکھ اﷲ تے ڈھیری
Verse 33جے فرزند ہندا اک لایق تاں ہندی خوش حالی میرے پچھے ہوندا بیٹا تخت ملک دا والی
Verse 34ایہہ اندیشے کر کے عاصم جا گوشے وچ وڑیا بیٹھ محل اکلے اندر بوہے سنگل جڑیا
Verse 35آون جاون لوکاں والا سارا بند کرایا نہ کجھ کھاوے نہ کجھ پیوے نیند آرام گوایا
Verse 36نہ اوہ کول کسے نوں سدے گلّ کلام نہ کردا گریازاری کم ہمیشہ گھڑی آرام نہ کردا
Verse 37چالیھ روز ہوئے اس اینویں مولٰی اگے روندا اسروں-یسروں محمد بخشا اوڑک ہک دن ہوندا
Verse 38میر وزیر عمرہ وڈیرے فکر کرن رل سارے کیہی مہم ایہہ ڈاہڈھی آئی شہنشاہ ہمارے
Verse 39کر مسلاہت کرو تدارک کجھ تدبیر بناؤ دو وزیر پیارے شاہ دے بوہا جائ کھلاؤ
Verse 40ہتھ بنھ عرض کرو شاہ اگے پچھو حالَ حقیقت کس سببوں گوشے بیٹھا اس ولّ کی مصیبت
Verse 41متّ سلطان اساڈا یارو حالَ حقیقت دسے کریئے کجھ تدارک چارہ متّ پھر ہسے رسے
Verse 42چہل وزیر عاصم دے آہے ہکّ تھیں ہکّ چنگیرے پر دو اوہناں وچوں آہے محرم خاص اگیرے
Verse 43صالح ابن حمید ہکیدا راوی نام بتاندا آدر-یوش ہاماں دا بیٹا دوجا آکھ سناندا
Verse 44ایہہ وزیر دوئیے اٹھ وگے کھولھ وڑے دروازہ شاہ پیا بےحال ڈٹھو نے لسا بے-اندازہ
Verse 45مردے-ونیے رنگ جسے تے زرد ہویا منہ پیلا اکھیں نہراں پانی دیون سرو ہویا پر تیلا
Verse 46نہ اس طاقت گلّ کرن دی نہ سی ہوش ٹکانے چا اٹھال بحال کراون گلاں زور دھننانے
Verse 47اول کر تئزیم سلاماں کردے پھیر سنائیں ثانی تیرا ناہیں شاہا مشرک مغرب تائیں
Verse 48ادنیٰ حصہ ملک تیرے دا شاہ سلیماں پایا حکم اقبال تساڈا حضرت دم دم ہوئے سوایا
Verse 49کئیں شہزادے تختاں والے چاکر تیرے اگے عالم فاضل کرن دوائیں تتی واء نہ لگے
Verse 50اسیں وزیر صلاحاں جوگے تیرے ہتھیں پالے فوجاں کٹک مہماں کارن دشمن مارن والے
Verse 51اسیں کمینے بندے تیرے تدھ توں گھول گھمائے کیسی ایہہ دلگیری تینوں پچھن کارن آئے
Verse 52محرم خاص تسیں منِ بھانے کہندا شاہ وزیراں افلاطون ارستو میرے عجب کرو تدبیراں
Verse 53جس دن دا میں ہویا سیانا پیر تخت تے دھریا عزت دولت نال ہمیشہ رہیوسُ ہریا بھریا
Verse 54کیتا کرم الٰہی میں تے بہتے تخت سمبھالے چالی شہزادے نت میری خدمت کرن سکھالے
Verse 55آسے آسے گئی جوانی فکر پیا ہن ایہا کالیاں رنگ وٹایا گورا آیا موت سنیہا
Verse 56ناہیں میں گھر بیٹا صالح دین دنی دا گہنہ ایہو داغ لگا وچ سینے سدا نہیں میں رہنا
Verse 57ایس اندیشے تختوں لاہیا راج ولوں چتّ چایاعاصم شاہ وزیراں اگے ویدن کھولھ سنایا
Verse 58شاہ اگے پھر عرض وزیراں کیتی ہو درماندے دسّ اسانوں ہے کی چارہ جہڑا وسّ اساں دے
Verse 59شاہ کیہا بن صبروں ایتھے ہور نہیں کوئی چارہ لیکن تسیں وزیر وڈیرے کر ویکھو ایہہ کارا
Verse 60جو علما حکیم سیانے رملی ہور نجومی کر اکٹھے پچھو ہووے کسے متے مئلومی
Verse 61جے میرے گھر دینا ہووے بیٹا آپ الٰہی تاں میں شکر گزار سمبھالاں تخت ولائت شاہی
Verse 62نہ ہووے تاں گوشے اندر ایویں چھپیا رہساں شور ککارا مشکل بھارا غم وچ کیوں کر سہساں
Verse 63ایہہ جواب عاصم دا سن کے لگی چپّ وزیراں باہر آئِ رل بیٹھے سارے کرن لگے تدبیراں
Verse 64سدّ نجومی عالم فاضل رملی ہور سیانے دتی لکھ معاش اوہناں نوں ونڈے ہور خزانے
Verse 65کیتی عرض وزیراں یارو اساں بنی ایہہ بھاری شاہ اساڈے دے گھر دسو ہوسی انس پیاری
Verse 66لگے کرن حساب نجومی ہو اکٹھے سارے برجاں وچوں وڑ وڑ نکلن گندے راس ستارے
Verse 67عاصم تے صفوان شہزادے نالے حرم دوہاں دے جوڑ بناون حرف اکٹھے لکھدے نام چوہاں دے
Verse 68گن کے ادد سبھے حرفاں دے جمع کرن چا باراں باقی اتے لیکھا پاون کر کر سمجھ ہزاراں
Verse 69شاہ عاصم دے تلء جاگے اگوں کی کجھ ہوسی آس مراد اوہدی ربّ دیسی یا اینویں نت روسی
Verse 70کر کے سمجھ نجومی کہندے چنگی فعال وزیرو دیہو مبارک عاصم شاہ نوں تکڑے ہوؤ امیرو
Verse 71شاہ بدخشاں دے دی بیٹی جے عاصم نوں لبھے اس وچوں ربّ بیٹا دیسی ہوسن صفتاں سبھے
Verse 72عادل عالم فاضل ہوسی ملکاں وچ اجاگر ہلم ہیا ہدایت والا سوہنا سخی بہادر
Verse 73لمی عمر حیاتی والا رہسی نال اکبالاںایویں آیا نظر وزیرو سانوں اندر فالاں
Verse 74جاں ایہہ خبر گئی سلطانے خوشی ہوئی اس گلّ دی گوشے تھیں اٹھ آیا بیٹھا تختے اتے جلدی
Verse 75شکر ہزار گزار وزیراں کیتی آن سلامی لکھ کروڑ دتے سر صدقے لین انعام انعامی
Verse 76لا دربار بیٹھا شاہ عاصم وچ امیر وزیراں عالم رملی رخصت کیتے دے دھرم ارتھ جاگیراں
Verse 77صالح ابن حمید وزیرے نال لائے سرکردےچالی ہور وزیر سیانے صاحب عقل ہنر دے
Verse 78کئیں حکیم افلاتوں جیہے کار-روا جگّ دیدے سبھناں اتے افسر کیتا صالح ابن ہمیدے
Verse 79ڈالی تحفے بہت اجائب کئیں ہزار سوغاتاں صالح دے حوالے کیتیاں گھلیا کارن باتاں
Verse 80کہیوسُ جیکر آئؤں فتہیا ہور بہں تدھ بخشاں صالح نال اقبال روانہ ہویا طرف بدخشاں
Verse 81شاہ بدخشاں والے اگے تحفے جا گزرانےنالے صالح گلاں کر کے کھولھ دسے پروانے
Verse 82جاں پھر شاہ بدخشاں والے سمجھی گلّ تمامیشکر گزار وکیلاں تائیں خلعت دے گرامی
Verse 83بہتی عزت خدمت کیتی دتے محلیں ڈیرے رات دہاں مہمانی دیندا کرے اوہناں ولّ پھیرے
Verse 84ستّ دہاڑے خاتر کر کے رکھے زور دھننانےرنگاں رنگاں دے نت دیندا بادشاہانی کھانے
Verse 85اٹھویں روز تیاری کیتی بیٹی ڈولی پائے جو کجھ داج شہانہ دتا کون حساب سنائے
Verse 86گھوڑے خچر اوٹھ ہزاراں موتی لئل جواہر لکھاں تھان دتے زربفتی دولت انتوں باہر
Verse 87گولیاں گولے سوہنے سندر زیور لائِ شنگارےڈولی دا سر صدقہ کر کے دتے باپ بیچارے
Verse 88جنہاں نال پیار بیٹی دا سنگ سہیلیاں داعیاں لائیاں نال رکھو خوش اس نوں وانگن بھیناں مائیاں
Verse 89لشکر سنے وزیراں تائیں بخشے جوڑے گھوڑے دے ہتھیار بھلیرے ٹورے نالے کلغی توڑے
Verse 90طرف مصر دے ہوئے روانے جاں پھر نیڑے آئے دے خوش-خبر وزیرے قاصد عاصم طرف وگائے
Verse 91عاصم شاہ سلطان اچیرے تنبو باہر لوائے شادی دے اسباب تمامی اوتھے آن سہائے
Verse 92تنبو خیمے جڑت جڑاؤ موتی تے زر-کاریسورج نال رلاون رشماں لگے پھلّ کناری
Verse 93پلے سیؤن سبھ زردوزی طلے جائی دھاگے سیج وچھی وچ عاصم شاہ دی کوہیں جھلمل لاگے
Verse 94آ دربار شہانہ لگا خلقت کٹھی ہوئی زمیں زمن وچ آدم دسدا انت نہ آوے کوئی
Verse 95دیبا تے زربفت ہریروں اطلس خیمے لائے شالاں سچیاں ہور غلیچے فرش فروش وچھائے
Verse 96اگے چھتر سنہری لائے چمک دسن اسماناں کیتی چھاں جہانے اتے اچیاں سائباناں
Verse 97بادشاہی زربفت وچھائے پھلاں سیج وچھائیکرسی ہور جڑاؤ سوہنی ہر سرکردے پائی
Verse 98چارے تاک محل سہایا امبر تے سر طاقاں ہر تاکے وچ سوہنے کھیڈن الفت نال اتفاکاں
Verse 99سائباناں ہیٹھ ہر جائی بیٹھی خلق چپھیرے حوراں ویکھ ہوون دل گھائل کنجریاں دے پھیرے
Verse 100عاصم شاہ تکّ مجلس رسی جشن نوروز منائے خیش قبیلے محرم خاصے میر وزیر سدائے
Verse 101عجب اجائب چیز نئمت کھانے بہت منگائے دھکھن عود گئی بو کوہیں عطر امبیر ڈلھائے
Verse 102کھانے کھا ہوئے آسودے مشکوں خوشی دماغاں پی شراب ہوون رنگ تازے جیوں کر لاٹ چراغاں
Verse 103شاہ بدخشاں دے دی بیٹی عاصم شاہ ویاہی آس لگی وت بیٹا دیسی کرسی کرم الٰہی
Verse 104بیگم نال کریندا خوشیاں چین ہویا پھر تازہ مارے تاک فکر دے کھلھا خوشیاں دا دروازہ
Verse 105بیگم نال سہیلی جہڑی شاہ بدخشاں ٹوری صالح ابن ہمیدے ہک دن ڈٹھی سی اوہ گوری
Verse 106ویکھن سار اوہدا دل وکیا صالح ربّ دھیاوے بیگم دی سہیلی ایہہ جو کویں مینوں ہتھ آوے
Verse 107عاصم شاہ دے اوس وزیرے دتی عشقَ زہیریصبر قرار آرام نہ رہیوسُ رات دہاں دلگیری
Verse 108جیوں پنجرے وچ پنکھی ہندا تویں وقت لنگھائی بھلّ گیاں تدبیراں ہوشاں دانش عقل دانائی
Verse 109ہوئی خبر امیراں تائیں عشقے دے افالوںعاصم شاہ نوں واقف کیتا صالح دے اہوالوں
Verse 110چا بخشی سلطانے اس نوں اوہ معشوق پیاری عقد کیتا خوش وسن لگے بھلی خفگی ساری
Point at or tap a word to see its meaning. With a keyboard, Tab reaches the words and the arrow keys move between them.