دوہڑے بلھے شاہ
Dohre (Bulleh Shah)
The dohre of Bulleh Shah in the order of the Wikisource page دوہڑے بلھے شاہ (56 dohre; punjabi-kavita.com gives 50 of them in the same order).
اپنے تن دی خبر نہ کائی، ساجن دی خبر لیاوے کون۔نہ ہوں خاکی نہ ہوں آتش ، نہ ہوں پانی پؤن ۔
کپے وچ روڑ کھڑکدے ، مورکھ آکھن بولے کون ۔بلھا سائیں گھٹ گھٹ رویا،جیوں آٹے وچ لون ۔
اﷲ توں میں تے قرض بنایا، ہتھوں توں میرا قرضائی ۔اوتھے تاں میری پرورش کیتی، جتھے کسے نوں خبر نہ کائی ۔
اوتھوں تانہیں آئے ایتھے ، جاں پہلوں روزی آئی ۔بلہے شاہ ہے عاشق اسدا، جس تحقیق حقیقت پائی ۔
اربہ-عناصر محل بنایو، وچ وڑ بیٹھا آپے ۔آپے کڑیاں آپے نینگر، آپے بننا ایں ماپے ۔
آپے مریں تے آپے جیویں، آپے کریں سیاپے ۔بلھیا جو کجھ قدرت ربّ دی، آپے آپ سننجاپے ۔
بھٹھّ نمازاں تے چکڑ روضے، کلمے تے پھر گئی سیاہی ۔بلہے شاہ شہہ اندروں ملیا، بھلی پھرے لکائی ۔
بلھا قصر نام قصور ہے، اوتھے مونہوں نہ سکن بول ۔اوتھے سچے گردن ماریئے، اوتھے جھوٹھے کرن کلول ۔
بلہے چل باورچیخانے یار دے، جتھے کوہا کوہی ہو ۔اوتھے موٹے کسن بکرے، توں لسا ملے نہ ڈھو ۔
بلہے نوں لوک متیں دیندے، بلھیا توں جا بہو مسیتی ۔وچ مسیتاں کی کجھ ہندا، جو دلوں نماز نہ کیتی ۔
باہروں پاک کیتے کی ہندا، جے اندروں نہ گئی پلیتی ۔بن مرشد کامل بلھیا،تیری ایویں گئی عبادت کیتی۔
بلہے کولوں چلھا چنگا، جس پر تائم پکائی دا ۔رل فقیراں مجلس کیتی، بھورا بھورا کھائی دا ۔
بلہے شاہ چل اوتھے چلیئے، جتھے سارے ہوون انھے ۔نہ کوئی ساڈی قدر (ذات) پچھانے، نہ کوئی سانوں منے ۔
بلہے شاہ اوہ کون ہے، اتم تیرا یار ۔اوسے کے ہاتھ قرآن ہے، اوسے گل زنار ۔
بلھیا اچھے دن تے پچھے گئے، جب ہر سے کیا نہ ہیت ۔اب پچھتاوا کیا کرے، جب چڑیاں چگ گئی کھیت ۔
بلھیا عاشق ہوئیوں ربّ دا، ملامت ہوئی لاکھ ۔لوک کافر کافر آکھدے، توں آہو آہو آکھ ۔
بلھیا آؤندا ساجن ویکھ کے، جاندا مول نہ ویکھ ۔مارے درد فراق دے، بن بیٹھے باہمن شیخ ۔
بلھیا چل سنیار دے، جتھے گہنے گھڑیئے لاکھ ۔صورتَ آپو اپنی، توں اکو روپا آکھ ۔
بلھیا چیری مسلمان دی، ہندو توں قربان ۔دوہاں توں پانی وار پی، جو کرے بھگوان ۔
بلھیا دھرم سالا دھڑوائی رہندے، ٹھاکر دوارے ٹھگّ ۔وچ مسیتاں کستئیے رہندے، عاشق رہن الگّ ۔
بلھیا دھرم سالا وچ ناہیں، جتھے مومن بھوگ پوائے۔وچّ مسیتاں دھکے ملدے، ملاں تیوڑی پائے ۔
دولتمنداں نے بوہیاں اتے، روبدار بہائے ۔پکڑ دروازہ ربّ سچے دا،جتھوں دکھ دل دا مٹ جائے۔
بلھیا غین غرورت ساڑ سٹّ، تے مان کھوہے وچ پا ۔تن من دی سرت گوا وے، گھر آپ ملیگا آ ۔
بلھیا ہر مندر میں آئکے، کہو لیکھا دیو بتا ۔پڑھے پنڈت پاندھے دور کیئے، احمق لیئے بلا ۔
بلھیا ہجرت وچ اسلام دے، میرا نت ہے خاص آرام ۔نت نت مراں تے نت نت جیواں، میرا نت نت کوچ مقام ۔
بلھیا عشقَ سجن دے آئے کے، سانوں کیتو سو ڈوم ۔اوہ پربھا اساڈا سخی ہے، میں سیوا کنوں سوم ۔
بلھیا جیسی صورتَ این دی، تیسی صورتَ غین۔اک نکتے دا پھیر ہے ، بھلا پھرے جہان ۔
بلھیا جے توں غازی بننیں، لکّ بنھ تلوار۔پہلوں رنگھڑ مار کے ، پچھوں کافر مار ۔
بلھیا کنک کوڈی کامنی، تینوں ہی تلوار ۔آئے تھے نام جپن کو، اور وچے لیتے مار ۔
بلھیا قصور بے دستور، اوتھے جانا بنیا ضرور ۔نہ کوئی پنّ نہ دان ہے، نہ کوئی لاگ دستور ۔
بلھیا کھا حرام تے پڑھ شکرانہ، کر طوبہ ترک سوابوں ۔چھوڑ مسیت تے پکڑ کنارہ ، تیری چھٹسی جان عذابوں ۔
اوہ حرف نہ پڑھیئے مت ، رہسی جان جوابوں ۔بلہے شاہ چل اوتھے چلیئے، جتھے منع نہ کرن شرابوں ۔
بلھیا من منجولا منج دا، کتے گوشے بہکے کٹّ ۔ایہہ خزانہ تینوں عرش دا، توں سمبھل سمبھل کے لٹّ ۔
بلھیا میں مٹی گھمیار دی، گلّ آکھ نہ سکدی ایک ۔تتڑ میرا کیوں گھڑیا، مت جائے الیک سلیک ۔
بلھیا ملاں اتے مثعلچی، دوہاں اکو چتّ ۔لوکاں کردے چاننا، آپ ہنیرے وچ ۔
بلھیا پینڈے پڑے پریم کے، کیا پینڈا آواگون ۔اندھے کو اندھا مل گیا، راہ بتاوے کون ۔
بلھیا پرسوں کافر تھی گئیوں، بتّ پوجا کیتی کل ۔اسیں جا بیٹھے گھر اپنے، اوتھے کرن نہ ملیا گلّ ۔
بلھیا پی شراب تے کھا کباب، ہیٹھ بال ہڈاں دی اگّ ۔چوری کر تے بھنّ گھر ربّ دا، اوس ٹھگاں دے ٹھگّ نوں ٹھگّ ۔
بلھیا قاضی راضی رشوتے، ملاں راضی موت ۔عاشق راضی راگ تے، نہ پرتیت گھٹ ہوت ۔
بلھیا رنگ مہلیں جا چڑھیوں، لوکی پچھن آکھن خیر ۔اساں ایہہ کجھ دنیاں توں وٹیا،منہ کالا تے نیلے پیر ۔
بلھیا سبھ مجازی پوڑیاں، توں حالَ حقیقت ویکھ ۔جو کوئی اوتھے پہنچیا چاہے، بھلّ جائے سلامئلیک ۔
بلھیا وارے جائیے اوہناں توں،جہڑے گلیں دین پرچا ۔سوئی سلائی دان کرن، تے آہرن لین چھپا ۔
بلھیا وارے جائیے اوہناں توں،جہڑے مارن گپّ سڑپّ ۔کؤڈی لبھی دین چا ، تے بغچا گھؤ-گھپّ ۔
پھری رتّ شگوپھیاں والی، چڑیاں چگن نوں آئیاں ۔اکنا نوں جریاں لے کھادھا، اکنا نوں پھاہیاں لائیاں ۔
اکنا نوں آس مڑن دی آہی، اک سیخ کباب چڑھائیاں ۔بلہے شاہ کی وسّ اوہناں دے، اوہ قسمت مار وسائیاں ۔
ہور نے سبھے گلڑیاں، اﷲ اﷲ دی گلّ ۔کجھ رولا پایا عالماں، کجھ کاغذ پایا جھلّ ۔
ان کو مکھ دکھلائے ہے، جن سو اس کی پریت ۔ان کو ہی ملتا ہے، وہ جو اس کے ہیں میت ۔
اس کا مکھ اک جوت ہے، گھنگھٹ ہے سنسار ۔گھنگھٹ میں وہ چھپّ گیا، مکھ پر آنچل ڈار ۔
اٹّ کھڑکے دکڑ وجے، تتا ہووے چلھا ۔آون فقیر تے کھا کھا جاون،راضی ہووے بلھا ۔
کنک کوڈی کامنی، تینوں ہی تلوار ۔آیا سیں جس بات کو، بھول گئی وہ بات ۔
منہ دکھلاوے اور چھپے، چھل بل ہے جگ دیس ۔پاس رہے اور نہ ملے، اس کے بسوے بھیس ۔
نہ خدا مسیتے لبھدا، نہ خدا وچ کعبے ۔نہ خدا قرآن کتاباں، نہ خدا نمازے ۔
نہ خدا میں تیرتھ ڈٹھا، ایویں پینڈے جھاگے ۔بلھا شہہ جد مرشد مل گیا، ٹٹے سبھ تگادے ۔
رنگھڑ نالوں کھنگھر چنگا، جس پر پیر گھسائیدا ۔بلھا شہہ نوں سوئی پاوے ، جو بکرا بنے قصائی دا ۔
ٹھاکر دوارے ٹھگّ بسیں، بھائی دوار مسیت ۔ہرِ کے دوارے بھکھّ بسیں، ہمری ایہہ پرتیت ۔
اوہ ہادی میرے اندر بولیا، رڑھ پڑھ گئے گناہاں ۔پہاڑیں لگا باجرہ، شہتوت لگے پھرواہاں ۔
وحدت دے دریا دسیندے، میری وحدت کت ول دھائی۔مرشد کامل پار لنگھایا ، باجھ تلھے سرناہی ۔
پڑھ پڑھ عالم فاضل ہوئیوں،کدے اپنے آپ نوں پڑھیائی نہیں۔
جا جا وڑدا ایں مندر مسیتیں،کدے من اپنے وچ وڑیائی نہیں ۔
ایویں روز شیطان نال لڑنے،کدے نفس اپنے نال لڑیائی نہیں ۔
بلہے شاہ اسمانیں اُڈدیاں پھڑنے،جہڑا گھر بیٹھا اوہنوں پھڑیائی نہیں ۔
ربّ ربّ کردے بڈھے ہو گئے ملاں پنڈت سارے ۔ربّ دا کھوج کھرا نہ لبھا اتے سجدے کر کر ہارے ۔
ربّ تے تیرے اندر وسدا ایہدے وچ قرآن اشارے ۔بلہے شاہ ربّ اوہنوں ملدا جہڑا یار توں تن من وارے ۔
توں وار دے ہر شے یار اپنے توں جے جتنی عشقَ دی بازی ۔یار دے ناں دی توں نیت کھلو جا تینوں آکھن عشقَ نمازی ۔
تیرا یار کہے جے توں گھنگرو پا لے بھاویں فتوے لاوے قاضی ۔بلہے شاہ جگّ رسدا رسّ جاوے پر اساں یار نوں رکھنا ایں راضی ۔
این عشقَ دے محکمے میں گیا، اگوں عشقَ نے میری کڑئی لٹّ لئی ۔میں گیا ساں عشقَ سداگرے ونّ، اگوں عشقَ نے میری رسئی لٹّ لئی ۔
عشقَ لٹدا ولیاں پیغمبراں نوں، کئیاں بادشاہاں دی بادشاہی لٹّ لئی ۔اجے تیرا کی لٹیا اے بلھیا، ایس عشقَ خدا دی خدائی لٹّ لئی ۔
پنجے وقت نمازاں پڑھیاں، تے تینوں لوکی آکھن نمازی ۔جنگ کر کے مڑ جت گھر آئیوں، تینوں لوکی آکھن غازی ۔
چڑھ انصاف دی کرسی بیٹھوں، تینوں لوکی آکھن قاضی ۔بلہے شاہ توں کجھ وی نہیں کھٹیا، جے توں یار نہ کیتا راضی ۔
جے میں تینوں باہر ڈھونڈاں، تے میرے اندر کون سمانا ۔جے میں تینوں اندر ڈھونڈاں، پھیر مکئیئت جانا ۔
سبھ کجھ توں ایں تے سبھ وچ توں ایں، تے میں تینوں سبھ توں پاک پچھانا ۔میں وی توں ایں تے توں وی توں ایں، ایتھے بلھا کون نمانا ۔
Point at or tap a word to see its meaning. With a keyboard, Tab reaches the words and the arrow keys move between them.
Editorial gloss, not yet reviewed.